Мәжіліс Қазақстан мен Сербия арасындағы инвестицияларды өзара қорғау келісімін ратификациялады
Инвестициялар және даму вице-министрі Рахым Ошақбаевтың айтуынша, келісім елдер арасындағы ынтымақтастықты нығайта түсуге бағытталған.
Қазақстан мен Сербия өз мемлекеттерінің заңнамаларына сәйкес, барлық салық міндеттемелерін орындаған инвесторларға олардың инвестицияларына байланысты сомаларды және инвестицияларға қатысты аударылатын төлемдер аударылымын қамтамасыз етуге уағдаласып отыр.
«Сербия Қазақстан үшін перспективалық әрі маңызды әріптес болып табылады. Сонымен қатар Сербия Қазақстанның 2017-2018 жылдарына БҰҰ Қауіпсіздік Кеңесінің тұрақты емес мүшелігіне кандидатурасына қолдау білдірген. Екі ел арасындағы ынтымақтастық әлеуеті өте зор», - деді Инвестициялар және даму вице-министрі Рахым Ошақбаев.
Р.Ошақбаев айтқандай, тұтастай алғанда 2005 жылдан бастап 2015 жылдың бірінші тоқсанына дейінгі аралықта Сербияның Қазақстанға инвестициялары 6,3 млн долларды құраған. Ал осы кезеңде Қазақстанның Сербияға инвестициясы екі миллион долларды құрап отыр.
«Кеден органдарының мәліметтеріне қарағанда, Қазақстан мен Сербия арасындағы тауар айналымы тұрақты түрде өсіп отыр. Мәселен, ағымдағы жылдың қаңтар-мамыр айларында тауар айналымы 7,8 млн. долларды құраса, былтырғы 2014 жылы бұл көрсеткіш 20 млн. долларға жеткен болатын», - деді вице-министр.
«Жоспарлауымызша, келісімнің ратификациялануы Қазақстан үшін сербиялық инвестицияларды алуға мүмкіндік ашады. Сондай-ақ, бұл келісім Қазақстан мен Сербия арасындағы келісімді және конструктивті диалогті дипломатиялық қарым-қатынастың жиырма жылдығы аясында нығайтады», - деді ол.
