Қазақстан мен Германия арасындағы ынтымақтастық табысты дамуда
«Халықаралық бағдарламалар орталығы» АҚ баспасөз қызметі хабарлағандай, іс-шара Германия халқы үшін маңызы зор – Неміс бірлігі күні ұйымдастырылды. Үстіміздегі жылы Германияның бірігуі туралы шартқа қол қойылғанына 25 жыл толып отыр. Қазақстандық диаспора өкілдері Қазақстан мен Германия арасындағы ынтымақтастыққа арналған мерекені ұйымдастырды. Шақырылған қонақтардың назарына Қазақстан туралы «The amazing country Kazakhstan», «Welcome to Kazakhstan — heart of Eurasia», «Astana, Eхpo-2017», «Baiga», «Bolashak» бейне материалдар, Қазақстан туралы альбомдар мен кітаптар ұсынылды.
Қонақтар ұлттық колоритке барынша баға беріп, қазақтың ұлттық асынан дәм татты, сондай-ақ дәстүрлі қазақ дастарханы салтанатына қатысты.
Іс-шараны ашу салтанаты алдында Германияның Қазақстандағы бұрынғы елшісі Ханс Кайльхольц мырза сөз сөйлеп, Германия мен Қазақстан арасындағы дипломатиялық қарым-қатынастың қалыптасуына тоқталып, елдер арасындағы экономиканың түрлі салаларындағы табысты ынтымақтастық, елді дамытудағы «Болашақ»президенттік стипендиясының рөлі туралы сөз қозғады.Кайльхольц мырза ұлтаралық өзара қарым-қатынастың одан әрі дамитындығына сенім білдірді.
Кездесуге Хоппегартен бургомистрі Карстен Кноббе қатысып, іс-шараны ұйымдастырушыларға өз алғысын білдірді,сондай-ақ Германиядағы Қазақстан диаспорасының өкілдерімен одан әрі ынтымақтастықта болатындығына сенімі мол екендігін білдірді.
