• Басты
  • Елордалық оқушыларға темір жолдағы қауіпсіздік ережелері туралы сабақ өткізілді

Елордалық оқушыларға темір жолдағы қауіпсіздік ережелері туралы сабақ өткізілді

5 Қазан, 2015 20:46
Астана қаласының №61 және №36 мектептерінде «Локомотив» - «Астана локомотив жөндеу депосы» АҚ филиалының өкілдері «Темір жол – жоғары қауіпсіздік аймағы» тақырыбында сабақ жүргізді.

«ҚТЖ» ҰК» АҚ баспасөз қызметі хабарлағандай, акцияның мақсаты – темір жол нысандарында, темір жол қиылыстары мен өтпелерінде бала өмірінің қауіпсіздігін қамтамасыз ету.

№61, №36 мектептер темір жолдарға жақын орналасқандықтан профилактикалық сабақты осы мектептерде өткізу жөн деп саналды. 

Акция барысында ұйымдастырушылар мектеп оқушыларына темір жолдағы қауіпсіздік ережелері бар буклеттерді үлестірді.

«Темір жолды тек арнайы белгіленген жерлерден, пойыздың жоқ екендігінен көз жеткізгеннен кейін ғана өтуге рұқсат етілген. Естеріңізде болсын, темір жол нысандарынан өту кезінде барынша мұқият, абай болу керек»,- деді еңбекті қорғау және қауіпсіздік техникасы бас инженері Гүлзат Әлжанова. 

Маманның айтуынша, темір жолда орын алатын травматизм адамдардың салғырттығынан болады.

«Көп жағдайда адамдар құлаққаптармен музыка тыңдап немесе ұялы телефонмен сөйлесіп, пойыздың келе жатқанын байқамайды. Осының салдарынан қайғылы оқиғалар орын алады. Темір жол рельсі – жаяу жүргіншілер жолы емес. Сондықтан барынша сақ болғандарыңыз абзал. Алайда, көп адамдар бұл ережелерді сақтай бермейді. Пойыздың тежеу жолы 800 метрден 1600 метрге дейінгі қашықтықты талап етеді, сондықтан машинист пойызды тежеп үлгермеуі әбден мүмкін»,- деп ескертті Г.Әлжанова.

Темір жолды тек арнайы белгіленген орындардан ғана өту керектігін оқушыларға тағы бір мәрте қайталап айтты.

Темір жол нысандарын тиісті емес орындардан кесіп өтуге, вагондардың маңынан жүруге болмайды, рельстарда тұруға және отыруға тыйым салынған.  

 

Барлық жаңалықтар