Астанада «Мәңгілік ел – болашағы біртұтас ұлт» патриоттар форумы өтеді
Форум жұмысына еліміздің барлық өңірінен 2 мыңнан аса делегат қатысады деп күтілуде. Олардың қатарында өз ісінің нақ шеберлері: дәрігерлер, мұғалімдер, өнеркәсіп жұмысшылары, аграрийлер, кәсіпкерлер, ғалымдар, жастар көшбасшылары, қоғам қайраткерлері, спортшылар, талантты әртістер мен мәдениет қайраткерлері және тағы басқалары бар.
Патриоттар форумы Қазақстан өңірлерінде 2007 жылдан бастап өткізіліп келеді. Осы жолғы форум Елбасы Нұрсұлтан Әбішұлы Назарбаевтың «Мәңгілік ел» жалпыұлттық идеясына арналып отыр.
Айта кетерлігі, форум аясында жыл сайынғы «Жыл патриоты» байқауының марапаттау рәсімі өтеді. Байқаудың 7 номинациясы бойынша ерлік танытқан қазақстандықтар мен күнделікті ісімен өз Отанына деген патриоттық сезімін көрсеткен тұлғалар марапатталады.
Патриоттар форумы ҚХА-ның «Үлкен ел үлкен отбасы» жалпыұлттық жобасының ашылуына жол ашады. Шара Елбасы Нұрсұлтан Назарбаевтың «100 нақты қадам» Ұлты жоспары аясында жүзеге асырылып отыр.
Жоба аясында болашағы біртұтас ұлтты құру жолында рухани және мәдени тәрбие беру мақсатында әлеуметтік жобалар мен ауқымды акциялар кешені өткізілетін болады.
Индира Кауметова
