Ұлттық комиссия мүшелері Маңғыстау облысының іскер әйелдерімен кездесті

2 Қазан, 2015 20:43

ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия төрайымының орынбасарлары (бұдан әрі - Ұлттық комиссия) Парламент Мәжілісінің депутаты Елена Тарасенко мен ҚР Орталық сайлау комиссиясының мүшесі Ләззат Сүлеймен жұмыс сапарымен Маңғыстау облысына келді.

Жұмыс сапары аясында Ұлттық комиссия мүшелері облыс әкімі жанындағы Әйелдер істері және отбасылық-демографиялық саясат жөніндегі комиссияның отырысына қатысып, онда облыстық комиссияның ағымдағы кезеңдегі қызметі туралы есебі тыңдалды және әйелдер көшбасшылығының мәселелері, «Тұрмыстық зорлық-зомбылық профилактикасы туралы» ҚР Заңын жүзеге асыру бойынша қабылданған шаралар барысы талқыланды.

Сонымен бірге, Ұлттық комиссияның мүшелері Астана қаласындағы Еуропадағы қауіпсіздік және ынтымақтастық ұйымы бағдарламалары Офисінің басшысы, Елші Наталия Заруднаяның қатысуымен өткен «Саясаттағы және жергілікті өзін-өзі басқару мәселелеріндегі кешенді гендерлік тәсілдің қағидалары» тақырыбында семинар-тренингке қатысты.

Семинар әлеуметтік саясатты жүзеге асыру мақсатында гендерлік аспектілерді кешенді түрде қолдануға жергілікті атқару органдарының өкілдерін, облыс мекемелерінің басшыларын, сондай-ақ үкіметтік емес ұйымдар басшыларын оқытуға бағытталған.

Бұдан кейін Ұлттық комиссия мүшелері Ш.Есенов атындағы Каспий мемлекеттік технология және инжиниринг университеті базасында ұйымдастырылған «Кәсіпкер әйелдің бет-бейнесі» атты көрме жұмысымен танысты.

Сол күні Е. Тарасенко мен Л.Сүлеймен Түпқараған ауданының Форт-Шевченко қаласында ауданның іскер әйелдерімен кездесті. Кездесу барысында әйелдер кәсіпкерлігін дамыту келешегі туралы пікір алмасты.

Жұмыс сапарының қорытындысы бойынша Ұлттық комиссия төрайымының орынбасарлары облыстық комиссия жұмысын күшейту жөнінде бірқатар ұсынымдар берді.