Қазақстанда жер қойнауын пайдалану құқығын берудің жеңілдетілген тәртібі енгізілді

2 Қазан, 2015 18:57

Геологиялық барлауға инвесторларды көптеп тарту үшін алғаш рет «Жер қойнауы және жер қойнауын пайдалану туралы» ҚР Заңына жер қойнауын пайдалану құқығын берудің жалдау мөлшерлемесі жыл сайын өсетін жеңілдетілген тәртібі енгізілді, деп хабарлады ҚР ИДМ.

Пилоттық жоба ретінде тиісті процедураларды жүргізу үшін Степнагорск қаласының аумағы таңдап алынды. Жаңа кеніштерді анықтауда аталған елдімекенде орналасқан кен орнының болашағы зор. Бұған аймақтағы тау-кен өндірісінің дамуы дәлел бола алады.

Сонымен бірге осы аумақтағы инфрақұрылым да геологиялық барлау жұмыстарын жүргізуге қолайлы. Инвестициялар және даму министрлігі осы аймақты таңдап алған кезде Степногорскінің моноқала екенін ескерді және ҚР Үкіметінің 2014 жылдың 28 маусымындағы қаулысы бойынша бекітілген аймақтарды 2020 жылға дейін дамыту бағдарламасын жүзеге асыруда аталған жұмыстарды жүргізу аймақтың экономикалық әлеуетіне де оң әсер етеді.

Барлау жүргізу үшін жер қойнауын пайдаланудың жеңілдетілген құқығын алу бойынша өтініштер 2015 жылдың 1 қарашасынан қабылданады.

ҚР ИДМ барлық отандық және шетелдік инвесторларды мөлдір және ашық өтетін жер қойнауын пайдалану құқығын жеңілдетілген жаңа тәртіп бойынша алу процесіне қатысуға шақырады.

Барлық жаңалықтар