• Басты
  • ШҚО-да ұстаздар марапатталды (ФОТО)

ШҚО-да ұстаздар марапатталды (ФОТО)

2 Қазан, 2015 20:28
Халықаралық Мұғалімдер күніне арналған, салтанатты шара барысында білім беру және тәрбие ісінде жоғары көрсеткіштер көрсетіп жүрген, үздік педагогтар мен білім беру саласының ардагерлерін құттықтап, алғыс хаттар мен құнды сыйлықтар табыстады, деп хабарлады ШҚО ақпараттық орталығы.

Аталмыш шара қаламыздағы Металлургтер мәдениет сарайында өткізілді. Кіре берісте педагогтарды «Мұрагер» домбыра оркестрі қарсы алды, сондай-ақ, «Ұстаз баланың көзімен» балалар жұмысының фотокөрмесі келішулердің назарынан тыс қалмады.

Халықаралық Мұғалімдер күніне арналған салтанатты шараға ұстаздар, тәрбиешілер мен оқытушылар, педагогикалық еңбек ардагерлері, педагогикалық династиялар, көпбалалы педагог-аналар, жас педагогтар кеңесінің мүшелері, үкіметтік емес ұйым өкілдері шақырылды.

Мерекелік концерттен соң аймақтың білім беру жүйесінің дамуына үлес қосқан жаңашыл-ұстаздарды мақтау қағаздарымен және алғыс хаттармен марапаттау рәсімі басталды. Марапаттау рәсіміне облыс әкімі Даниал Ахметов қатысты:

«Сіздерді және сіздердің аттарыңыздан Шығыс Қазақстан облысының барлық педагогтарын Мұғалімдер күнімен шын жүректен құттықтаймын! Меніңше тәрбиеші, мұғалім, педагог мамандықтарынан асқан құрметті мамандық жоқ. Сіздер қарқынды дамып келе жатқан, тәуелсіз Қазақстанның жас ұрпағын тәрбиелеу жауапкершілігін арқалап келесіздер. «адамның адамгершілігі ұстаздан болады» деп Ұлы Абай бекер айтпаса керек-ті», - деді аймақ басшысы.

Сонымен қатар, облыстық кәсіби байқауларда жеңіске жеткен, 2015 жылдың ҰБТ қорытындысы бойынша ең жоғарғы нәтиже көрсеткен педагогтар мен ұстаздарға құнды сыйлықтар мен мақтау қағаздары табысталды.

Халықаралық Мұғалімдер күнін мерекелеу аясында бастауыш сынып мұғалімдерінің І облыстық Форумы және «Қ.Н. Нұрғалиевтің педагогикалық мұрасы» атты облыстық педагогикалық оқулары өткізілді.

Барлық білім беру мекемелерінде 21 қыркүйек пен 2 қазан аралығында экспозициялар, фотокөрме, «Ұстаз баланың көзімен» балалар сурет байқауы, «Менің алғашқы ұстазым» шағын шығармалар сайысы, «Алғашқы ұстаз» оқулары, кітаптар көрмесі, әдеби кездесулер, «Менің ұстазға сыйлығым» құттықтау калталарын жасау шаралары өткізілді.  

Айта кету керек, облысымызда 31130 педагогикалық қызметкер бар. Олардың 69,3 % - жоғарғы және бірінші категориялы ұстаздар.

 

Барлық жаңалықтар