• Басты
  • Астанада WorldSkills Competition сайысына қатысушылар марапатталды

Астанада WorldSkills Competition сайысына қатысушылар марапатталды

2 Қазан, 2015 12:48
Бүгiн техникалық және кәсiптiк бiлім беру жүйесiнiң 75 жылдық мерейтойы аясында өтiп жатқан халықаралық ғылыми-тәжiрибелiк конференция барысында WorldSkills Competition кәсiби шеберлiк халықаралық сайысына қатысушы Қазақстан құрамасы диплом және мерейтойлық медальдермен марапатталды.

Отандық құраманың мүшелерiн ҚР Мемлекеттiк хатшысы, WorldSkills International қазақстандық қозғалысының Қамқоршылық кеңесiнiң төрайымы Гүлшара Әбдiқалықова марапаттады. Сондай-ақ, бiлiм беру саласының бiрқатар мамандарына төл мерекелерi қарсаңында диплом және мерейтойлық медальдер салтанатты түрде табыс етілді.

«Қазақстанның құрамасы атынан әлемдiк аренада сынға түсiп, елiмiздiң намысын қорғау бiз үшiн үлкен құрмет. Сол сияқты, Алматы қаласында туризм индустриясы және қонақжайлылық колледжіне осы мамандыққа баулығаны үшін алғыс айтқым келеді. Жетекшілеріме, демеушілеріме, ата-анама дұрыс бағыт бергені үшін ризашылығымды білдіремін. Жеңістеріміз көп болуы үшін WorldSkills қозғалысын Қазақстанда дамытуды одан әрі жалғастыру керек деп ойлаймын», – деді WorldSkills Қазақстан қозғалысының ұлттық чемпионы, «Аспаз iсi» қызмет бабы бойынша халықаралық чемпионатына қатысушы Сергей Белоносов. 

Сонымен қатар, конференция барысында Н.Э.Бауман атындағы Мәскеу мемлекеттiк техникалық университетi мен «Кәсiпқор» холдингi» КЕАҚ арасында ынтымақтастық жөнiндегi меморандумға қол қойылды. Сол сияқты, «БжҚМИ» ұлттық техникалық зерттеу университетi мен «Кәсiпқор» холдингi» КЕАҚ ынтымақтастық жөнiнде меморандум жасады.

Барлық жаңалықтар