Астанада жыл басынан бері 1 млн 198 мың шаршы метр баспана пайдалануға берілді
2 Қазан, 2015 11:45
Астанада жыл басынан бері 1,198 млн шаршы метр баспана пайдалануға берілген. Бұл туралы бүгін Орталық коммуникациялар қызметінде өткен баспасөз мәслихатында Астана әкімінің орынбасары Сергей Хорошун мәлімдеді.
«Биылғы жылдың шілде айынан қаланың тұрғын үй қоры 300 мың шаршы метрге артты. Барлығы жыл басынан бері 1 млн 198 мың шаршы метр үй пайдалануға берілді. Бұл 10 мың 895 пәтер, өткен жылғы көрсеткіштен 74 пайызға артық», - деді С.Хорошун.
Оның сөзінше, осы уақытта қанатқақты жоба аясында 29 апаттық тұрғын үй кешені бұзылып, қаламыздың тұрғындары 328 пәтерді тегін алған.
«Қолжетімді баспана -2020» бағдарламасы аясында жыл басынан бері 228 мың шаршы метр баспана тапсырылды», - деп толықтырды ол.
«Бүгінде Астана қаласының тұрғын үй қоры 18,4 млн шаршы метрге жеткен. Бұл ретте қала әкімінің орынбасары астана көшірілген уақыттан бері елорданың тұрғын үй қоры 14 млн шаршы метрге өсті», - деді ол.
Анар Тәңірқұлова
