А.Сәрінжіпов «Үздік педагог» байқауының жеңімпаздарын марапаттады

«Ұстаз балаларға ең басты және ең қымбат байлық – білім береді. Елімізді өркениетке бастар жолдың бастауы мектеп десек, мектептің басты тұлғасы, жүрегі – мұғалім. Сіздердің ұрпақ тәрбиесіндегі еңбектеріңіз өлшеусіз. Өйткені, елдің бәсекелестікке қабілеті осы білім деңгейімен өлшенеді», – деген А.Сәрінжіпов ұстаздар қауымына зор денсаулық пен табыс тіледі. 

Министр байқау жеңімпаздарына «Үздік педагог» медалін табыстады. Ал, техникалық және кәсіптік мамандықтарда үздік атанған мұғалімдерге «Үздік педагог – 2015» атағы берілді. Сонымен қатар, салтанатты шара барысында А.Сәрінжіпов «Білім беру ісінің құрметті қызметкері» төсбелгілерін, «Еңбек ардагері» медальдерін және ҚР Білім және ғылым министрлігінің Құрмет грамотасын табыс етті. Қазақстанның түрлі өңірінен келген бірқатар ұстаздар «Қазақстан Республикасының білім беру ісінің құрметті қызметкері» және «Ыбырай Алтынсарин» төсбелгілерімен марапатталды. 

Үздік мұғалімдерді марапаттау салтанатының соңы мерекелік концертке ұласты. 

Еске сала кетейік, бүгін министр А.Сәрінжіпов 2016 жылдан бастап білімі мен біліктілік санаты жоғары мұғалімдердің жалақысы 66%-ға артатынын мәлімдеген болатын.