2015 жылдың бірінші жартыжылдығында 1 млн-нан астам қария скринингтік тексеруден өтті
«Ересек тұрғындар мақсатты тобының арасында әлеуметтік маңызды ауруларды анықтауға арналған Ұлттық скринингтік бағдарламаны жүзеге асыру аясында жыл сайын 2 млн-ға жуық қарт азаматтар скринингтен өтеді. Осылайша, биылғы жылдың бірінші жартыжылдығында 1 млн-нан астам адам тексеруден өтті», - деді С.Жақыпова.
Бірыңғай ұлттық денсаулық жүйесі аясында еркін таңдау қағидасы бойынша қарт азаматтар республиканың кез келген медициналық ұйымында жоғары мамандандырылған медициналық көмек ала алады.
Қарт адамдарды, оның ішінде жалғызбасты және тасымалдауға жатпайтын адамдарды күндізгі стационар және үй стационары жағдайында оңалтуға жағдай жасалуда.
«2011 жылдан бастап барлық емханаларда әлеуметтік қызметкерлер мен психологтар қызмет етуде. Олар ерекше ықыласты қажет ететін созылмалы аурулармен ауыратын адамдарға көмек көрсетеді», - деді ол.
Естеріңізге сала кетейік, жыл сайын 1 қазанда Қазақстанда Халықаралық қарттар күні аталып өтеді. Мерекенің басты мақсаты – қоғам назарын қарт жастағы азаматтардың проблемаларына аудару. Қазіргі таңда республикада 1 млн. 950 мыңнан астам қарт азаматтар бар.
Анар Тәңірқұлова
