«Нұрлы жол»: БҚО-да 2015 жылы 100 шақырымнан астам автомобиль жолдары жөнделеді

1 Қазан, 2015 18:39

БҚО-да осы жылы 100 км-ден астам автомобиль жолдары жөндеуден өтеді ,деп хабарлады «ҚазАвтоЖол»ҰК» АҚ Батыс Қазақстан филиалы қаржы бөлімінің бастығы Ерлан Қажымов «Нұрлы жол» бағдарламасы аясында жүзеге асырылып жатқан жобалар туралы әкімдікте өткен брифингте.

Оның айтуынша, аймақта «Нұрлы жол» мемлекеттік бағдарламасы аясында «Орал Тасқала Саратов» автомабиль жолы қалпына келтірілуде. Бұл көлік дәлізі Қазақстан мен Ресейдің шекаралас аймақтарын сапалы қозғалыспен қамтамасыз етеді және екі ел нарығындағы экспорт пен импортқа қолдау көрсетеді.

Бүгінде мердігер компания екі учаскіде 100 км жолға асфальтобетон жабындысын төсеуде. Аталмыш тас жолы кеден бекеттеріндегі өткізгіштікті арттыруға мүмкіндік береді. Жалпы, автожол ІІ техникалық санаттың 2 жолақты жол параметрі бойынша салынуда. Жолды қалпына кетіру жұмыстарын 2018 жылы аяқтау көзделген.

Бұдан басқа, аймақта ұзындығы 15 км «Чапаев Жалпақтал Казталовка РФ шк» автожол учаскесінде, ұзындығы 4 км «Казталовка Жәнібек РФ шк» автожол учаскесінде күрделі жөндеу жұмыстарын жыл соңына дейін аяқтау көзделген. Ал, ұзындығы 64 км «Подстепное-Федоровка РФ шк» автожол учаскесінде және ұзындығы 28 км Орал қаласынан РФ шекарасына дейін учаскеде орташа жөндеу жұмыстары жүргізілуде.

Жалпы жобаларға 415 дана техника тартылған.

Сонымен қатар, «Нұрлы жол» мемлекеттік бағдарламасы аясында автожол жобаларын жүзеге асыру облыста 1000 жаңа жұмыс орнын ашуға септігін тигізді.