К.Мәсімов астық жинау науқаны мәселелері бойынша Үкімет отырысын өткізді

Күн тәртібінде ағымдағы жылғы астық жинау науқанын жүзеге асыру мәселелері қаралды.

«Облыстық ауыл шаруашылығы басқармаларының мәліметтеріне қарағанда, 28 қыркүйекте 11 млн. га дәнді дақылдар немесе жиналатын аумақтың 74,7% жиналды. 13,2 млн. тонна дән бастырылды. Өнімділік - 12 ц/га. Бұл өткен жылғы көрсеткіштен  0,4 центнерге жоғары», - деді ҚР Ауыл шаруашылығы министрі Асылжан Мамытбеков.

Оның мәліметтеріне қарағанда, дәнді дақылдар егілетін үш негізгі аймақта  8,1 млн. га немесе 71,5% жиналды. 9,4 млн. тонна бастырылды. Орташа өнімділігі 11,6 ц/га. Осылайша, Ақмола облысында 3,1 млн. га астам (75,9%), Қостанай облысында - 2,6 млн. га (64,8%), Солтүстік Қазақстан облысында- 2,4 млн. га (74%) жиналды.

«Қазан айында жылы, жауын-шашын нормаға сәйкес болады деп күтілуде. Мал азығын дайындау жоспарлы түрде жүзеге асып жатыр», - деді  Ауыл шаруашылығы министрі.

А.Мамытбеков ауа райы қолайлы болған жағдайда егін жинау науқанын 10-15 күннен кейін аяқтау жоспарланғанын айтты.