Қазақстан мен Қытайдың инвесторлары үшін визалық режим жеңілдетілуі мүмкін

«Қазақстан мен Қытайдың  сауда-экономикалық ынтымақтастығының сапасын жақсарту бизнесмендер арасындағы  тығыз қарым-қатынасты дамытумен тікелей байланысты. Қазіргі кезде екі елдің кәсіпкерлік ынтымақтастығында әлі де еңбек рұқсатнамалары, визаның қажеттілігі мен тұрғылықты жерге берілетін рұқсат құжаты секілді мәселелерде  кедергілер бар»,-деді ҚХР Халықаралық сауданы дамыту комитеті төрағасының орынбасары Лу Пэнча Астанадағы инвестициялық форум форматындағы Қазақстан-Қытай іскерлік кеңесінің жұмыс отырысы барысында.

Оның айтуынша, визалық режимді жеңілдету екі ел арасындағы  сауда-экономикалық қарым-қатынасқа оң әсер етеді.

«Кіру және шығу сапарлардың рәсімін жеңілдету арқылы операциялық шығындарды төмендетуде оңтайлы нәтижені байқауға болады және сауда-экономикалық инвестициялар тұрғысында міндеттерді жеңілдетуге қолдау жасалады, өңірде экономикалық интеграция дәрежесі артады. Сонымен қатар, екі мемлекеттің сауда-өнеркәсіптік топтарының іскерлік ынтымақтастығы нығаяды», - деп атап өтті ол.

Анар Тәңірқұлова