А. Сәрінжіпов Павлодарда «Болашақ» халықаралық стипендия түлектерімен кездесу өткізді (ФОТО)

28 Қыркүйек, 2015 17:28

ҚР Білім және ғылым министрі Аслан Сәрінжіпов С.Торайғыров атындағы Павлодар мемлекеттік университетінде Қазақстанның солтүстік өңірлеріндегі «Болашақ» халықаралық стипендиясы түлектерімен бейресми кездесу (Informal Networking Conference) өткізді, деп хабарлады Білім және ғылым министрлігінің баспасөз қызметі.

Кездесуде «100 нақты қадам» ұлт жоспарын іске асыру шеңберінде Қазақстан Республикасындағы білімді жаңғырту мәселелері талқыланды. Диалогқа қатысушылар «Болашақ» бағдарламасының 70 түлегі, жоғары оқу орнының оқытушылары мен ғылыми қызметкерлері болды.

Informal Networking Conference жұмысында отандық білім және ғылымның негізгі даму бағыттары, оның сараптамалық әлеуеттік мүмкіндіктері мен «100 нақты қадам» ұлт жоспарын іске асырудағы «Болашақ» бағдарламасының жаңа ұсыныстары туралы талқыланды.

Кездесуде министр "Болашақтықтардың" қызықтырған сұрақ-сауалдарына жауап беріп, Президенттік стипендия иегерлерінің "Мәңгілік Ел" ұлттық идеясын жүзеге асыру мен ұстаным мазмұнын сақтауда атқаратын қызметіннің маңызын анықтап берді.

Еліміздің солтүстік өңірінде барлығы 360 "Болашақтықтар" еңбек етеді, оның ішінде 153 адам - Павлодар облысының түлектері.