ҚР ҰЭМ: Әлеуметтік инфрақұрылым нысандарын жекешелендіруде МЖӘ-нің түрлі үлгілері қолданылады
«Жекешелендіру үрдістерін іске қосу мақсатында Үкімет компанияларды бәсекелес ортаға берудiң бiрқатар тәсілiн ұсынды. Соларды атап өтер болсам, кейбір ең ірі активтер тікелей сату жолымен немесе IPO және SPO тетіктері арқылы қор нарығына шығару жолымен iске асырылады. Басқа компаниялар аукционда немесе компанияларға жеке инвестор қатысып отырған болса, тікелей сату тәсілдерін пайдалану арқылы сатылады», - деді министр.
Оның айтуынша, аукционда сатуға келер болсақ, өткен жылғы тәжiрибе көрсеткендей, аукционға шығарылған көптеген нысан қажеттi деңгейде бағасын төмендетуге жеткен жоқ. Сол себептi сату санына шектеу қойылады.
«Бірінші сауда-саттық ағылшын әдісі бойынша бағаны көтеру арқылы жүргізілсе, екінші және үшінші сауда голландтық тәсілмен бағаны түсіру арқылы жүргізіледі. Үш рет сауда жүргізгеннен кейін сатып алушылар болмаған жағдайда, нысан қайта құрылады немесе толық таратылады», - дедi министр.
Е.Досаев мәлiм еткендей, жақсы активтердің сатылып, ал аз қызығушылық тудыратын активтер мемлекетте қалып қоймауы үшін, бөлшектеусіз, қайта құрылымдаусыз немесе жеке бөлікке бөлусіз нысандарды сатуды қамтамасыз ету ұсынылады.
«Әлеуметтік инфрақұрылым нысандарын жекешелендіру кезінде ұзақ мерзімді мемлекеттік мүліктi ұзақмерзiмдi жалға алу, сенімгерлік басқару, сервистік келiсiмшарттар секiлдi мемлекеттік-жеке меншік әріптестіктiң түрлі үлгiлерi белсенді түрде қолданылады», - деді ол.
Министрдің айтуынша, барлық осы ұсыныстар заңнамалық рәсімдеуді талап етеді. Сондықтан, Үкiмет «100 нақты қадам» Ұлт жоспарын іске асыру аясында Парламент қарауына енгізілетін заңнамаға ауқымды түзетулер әзірледі.
«Алдыңғы жылдардағы жекешелендіру тәжірибесін ескере отырып, Үкімет бұл процестің барынша айқындығын және тиімділігін қамтамасыз етуге тырысады», - дедi Е.Досаев.
Оның айтуынша, жүргізілетін жекешелендіру бағыттары және оның тиімділігін арттыру бойынша ұсыныстар беретін, оған сүйелмелдеу мен мониторинг жүргiзуге тәуелсіз халықаралық консультанттар тартылады.
