ҚР Үкіметі экономиканы мемлекет иелiгiнен шығару мен жекешелендiрудің жаңа әдістерін әзірледі
«Жаңа құрылымдық экономикаға көшу тек жекелеген компаниялардың ғана емес, сонымен қатар тұтас салалар қызмет ету тиімділігін арттыруды талап етеді.Мемлекеттік меншіктің үлесін ЭЫДҰ елдерінің дәрежесіне жеткізу қажет. Бұл ЖІӨ-нің 15 пайызы. 2020 жылға таман Елбасы экономиканы мемлекет иелiгiнен шығару немесе жекешелендiруді жеделдетуді тапсырды», - деді Б.Сағынтаев.
Оның айтуынша, әлемдік тәжірибе экономика және жекешелендіруді шығындарды азайтуға алып келетіндігін, өндірісті басқару сапасын арттыратындығын көрсетіп отыр.
«Басымдықты тізбе 60 ірі компаниядан тұрады. Оның ішінде «Самұрық-Қазынаның» 38, «Бәйтеректің» 4, «ҚазАгроның» 4 және республика меншілігінде 14 нысан бар. Сонымен қатар «Самұрық-Қазына» қорының меншігіндегі басқа да компанияларды бәсекелестік ортаға беру ұсынылуда», - деді ол.
Сондай-ақ, ҚР Премьер-Министрінің бірінші орынбасары айтып өткендей, жекешелендіру үрдісі барынша ашық өтеді, осы мақсатта МcKinsey, BCG, Tony Blair Group сынды тәуелсіз халықаралық консультанттарды тарту жоспарланған.
Б.Сағынтаев өз сөзінде барынша ірі активтері стратегиялық серіктестердің қатысуымен IPO және SPIO механизмдрі арқылы қор нарығына, оның ішінде 2018 жылдың 1 қаңтарына дейін елордада құрылатын Халықаралық қаржы орталығы алаңына шығару арқылы сату болжанып отырғанын баса айтты.
«Басқа компанияларды егер жеке инвестор қатысушы болса, онда тікелей саудалау әдісін пайдалану арқылы аукционда сату ұсынылады. Бүгінгі күні компаниялардағы мемлекеттің қатысу үлесі 100 пайызды құрайды. Сатылымға бақылаушы және тосқауылдаушы акциялар топтамасы, яғни 25-тен 50-пайызына қосымша 1 және одан көп акция шығарылады», - деген Б.Сағынтаев.
Жеке меншік инвесторлары бар компаниялардың үлесі 50 пайызға дейін жеткізіледі.
Индира Кауметова
