Ақмола облысында «Қазақстандық немістер» көрмесі ашылды (ФОТО)

Ақмола облысының «Возрождение» немістер қоғамы» ҚБ бастамасымен Достық үйінде «Қазақстандық немістер» атты көрменің ашылуы өтті.  15 бөлімнен тұратын көрме неміс халқының тарихы мен бүгінгі күннен сыр шертетін құжаттардан тұрады.

Көрмеде қоғамдық бірлестіктің атқарып жатқан жұмыстары мен жетістіктері және бастамалары ерекше көрсетілген.

Көшпелі көрме Көкшетау қаласындағы «Қоғамдық келісім» мекемесінің ғимаратында ағымдағы жылдың 30 қыркүйегіне дейін жұмыс істейді.

Қазақ жерінде  өмір сүріп жатқан неміс халқының тарихы мен мәдениеті сонау 19 ғасырдың аяғында басталған еді. Қазақ жеріне алғаш табан тіреп , қоныстанған Петербор Ғылым Академиясының  мүшелері Г.Ф Миллер, П.С Паллас, Г. Гюлденштедт болған. Олардың арасында инженер, дәрігер, офицерлер де бар болатын. 1926 жылы қазақ жерінде  51 102  неміс ұлтының азаматтары тұрып жатты.

 Екінші дүниежүзілік соғыс кезінде Қазақстанға 444 мыңнан астам  немістер қоныстанып, олардың 100 мыңнан астамы сол  кездегі НКВД-ның еңбек әскерінде жұмыс істеді. Ауыр қара жұмыс пен  ашаршылыққа шыдай алмаған адамдар мыңдап қырылып жатты.  Соғыс жылдары ауылдарға қоныстанған немістер еңбекке араласа бастап, өз мамандықтары бойынша жұмыс істеді. Олар көмір өндіру, металлургия, мұнай өндіру орындарында қызу еңбекке араласты. Тың игеру жылдары неміс ұлтының азаматтары егін орағанының жоғарғы көрсеткіштерін берді. Өндіріс басшылары жоғарғы мемелекеттік наградаларды да иеленіп отырды. Қазақ жерінде неміс ауылдары пайда бола бастады.