ШҚО-да драма театрлардың XXIII фестивалі басталды

21 Қыркүйек, 2015 20:43

ШҚО-да облыстық драма театрында биылғы жылдың атаулы даталарына арналған, Қазақстан драма театрларының ХХІІІ республикалық фестивалінің ашылу салтанаты өтті, деп хабарлады ШҚО ақпараттық орталығы.

Шығыс Қазақстан облысы әкімінің орынбасары Жақсылық Омар және ҚР Мәдениет және спорт министрлігінің өкілі салтанатты шараға жиналған қауымды құттықтап, еліміздің әр түкпірінен үкілі үміттерін арқалап келген сахна саңлақтарына сәттілік тіледі.

«Өскемен қаласында жаңадан ашылған ғажайып ғимараттың қабырғасында өткелі отырған бұл театр мерекесі – Астана, Батыс Қазақстан, Қарағанды, Ақмола облыстарынан жиналған актерлер қауымы үшін үлкен тәжірибе алмасу алаңы болары сөзсіз. Олай болса, Шығыс топырағында тоғысқан шығармашылық ұжымдарға сәтті қойылымдар, ал көрермендерімізге қаламызға келген сахна саңлақтарының ғажайып өнерімен сусындар ғажайып сәттерді жіберіп алмаңыздар деген ізгі тілегімді білдіремін», – деді Жақсылық Мұқашұлы.

Айта кетейік, облыс орталығы Өскемен қаласында алғаш рет ұйымдастырылып отырған фестиваль, қыркүйек айының 21-і мен 24-і аралығында өткізілмек.