Ауыл шаруашылығы министрлігінде «Тіл – татулық тірегі» байқауы өтті
21 Қыркүйек, 2015 17:21
Қазақстан Республикасы Ауыл шаруашылығы министрлігі мемлекеттік тілдің қолданылу аясын кеңейту және оны дамыту мақсатында және Қазақстан халқы тілдерінің күні мен Қазақ хандығының 550 жылдығына орай ауыл шаруашылығы саласында жұмыс істейтін өзге ұлт өкілдері арасында «Тіл – татулық тірегі» байқауын өткізді, деп хабарлады ведомство.
Байқаудың мақсаты мен міндеттері өзге ұлт өкілдері арасында мемлекеттік тіл саясатын насихаттау, мамандардың іс жүргізудегі біліктілігі мен тәжірибесін сараптау, мемлекеттік тілде үздік іс жүргізуші мекеме, ұйымдарды, қызметкерлерді, моралдық және материалдық тұрғыдан көтермелеу.
Қатысушылар байқау барысында «Терминдер әлемі», өз өнерін көрсету, жаңылтпаш пен мақал-мәтел айтудан жарыс, салт-дәстүрлер түрлерін білу тәрізді кезеңдер арқылы сыналды. Қатысушылардың өнеріне Қазақстан Республикасы Мәдениет министрлігі Тіл комитетінің, Астана қалалық тілдерді дамыту басқармасының қызметкерлері баға берді.
Мереке соңында қатысушыларға арнайы дипломдар мен бағалы сыйлықтар тапсырылды.
