ШҚО-да Қазақстан халқының тілдері күні мерекесі аталып өтті (ФОТО)

Мерекелік шараға орай этноауылда Шығыс  Қазақстанда тұратын этностардың өкілдері өздерінің үйлерінің жандарында қонақтарды ән салып, би билеп, салт-дәстүрлерін көрсетіп, дастарханмен қарсы алды.

Өңір басшысы Даниал Ахметов әр этностың үйінің алдына тоқтап,  өнерпаздар дайындаған қойылымдарды тамашалап, барлығын Қазақстан халқының тілдері мерекесімен құттықтады.

Шара әр тілде ән шырқалып, өлең оқылған мерекелік концертке ұласты.

«Орыс әндері» ұжымының солисті Любовь Языкова мемлекеттік тілді меңгеруге зейін қойып, болашақта қазақ тілінде еркін сөйлеуді мақсат етіп отырғандығын жеткізді.

«130-дан астам ұлт пен ұлыс өкілдерін бір шаңырақ астында жинап отырған Қазақстанда мемлекеттік тілді үйренуге барлық жағдай жасалған. Сонымен қатар, осындай іс-шаралардың арқасында қазақ тілінің қоғамда белсенділігі артып, қолданыс аясы кеңейе түсетініне сенімім мол», - деді орыс этномәдени бірлестігінің мүшесі Любовь Языкова.

Бүгінгі күні Шығыс Қазақстан облысындағы 9 достық үйінің негізінде 71 этномәдени бірлестік жұмыс істеуде.  

Сонымен қатар, аймақ басшысы Даниал Ахметовтың тапсырмасына сәйкес Шығыс Қазақстан облысының мектептерінде 2015-2018 жылдарға арналған көптілділікті дамытудың Өңірлік бағдарламасы әзірленгендігін атап өте кету керек.