Алматыда 450 орындық Студенттер үйі ашылды
19 Қыркүйек, 2015 11:36
Алматыда ҚР Білім және ғылым министрі Аслан Сәрінжіпов және Алматы қаласы әкімі Бауыржан Байбектің қатысуымен Қазақ мемлекеттік қыздар педагогикалық университетінде студенттердің пайдалануына арналған үш нысан салтанатты түрде ашылады, деп хабарлады ҚР БҒМ.
Бірінші нысан–9 қабатты жатақхана–450 орынға арналған, «Студенттік тұрғын үй» мемлекеттік бағдарламасы аясында салынған Студенттер Үйі. Жатақхана барлық стандарттарға сәйкес келеді. Онда жаңа жиһаз, әрбір қабатта кір жуатын және ас үй бөлмелері бар.
Ғимараттың бірінші қабатында жақын уақытта студенттерге арналған медицина орталығы ашылады. Сондай-ақ жатақханада сұлулық салоны, жаттығуға арналған үлкен фитнес зал, компьютерлік класстар құрылып, заманауй телекоммуникациялық желі және жоғары жылдамдықты Wi-Fi жүргізілген.
Дәл осы күні ашылатын екінші және үшінші нысандар – 32 орынға арналған «Аққу» жабық бассейні және «Ақшатыр» жазғы мектебі.
