Семейде Абай оқулары мен жыршылар байқауы өтті (ФОТО)
Аталған Іс-шараларға облыстардың, Астана және Алматы қалаларының жалпы білім беретін мектептерінің, дарынды балаларға арналған республикалық мамандандырылған мектеп-интернаттардың 5-11 сынып оқушылары - Абай оқуларының және жыршылар байқауының өңірлік кезеңдерінің жеңімпаздары қатысты.
Қазақ хандығының 550 жылдығына арналған «Туады ерлер Ел үшін...» І Республикалық қазақ батырлық эпосы жыршыларының байқауының салтанатты ашылуы 9 қыркүйекте Семей қаласының Мәдениет үйінде өткізілді. Қатысушылар екі номинацияда: «Қайратты туған ер еді...» - қазақ батырлық эпостарын жатқа орындау сайысында және «Алатаудай айбатың, Ер екенсің айтулы» - қазақ батырлар жыры бойынша білім сайысында бақ сынасты.
Жеңімпаздар І, ІІ, ІІІ дәрежелі дипломдармен, мақтау қағаздарымен және сертификаттармен, сонымен қатар арнайы жүлделермен марапатталды. Аталған іс-шаралар аясында оқушылар Абай ауданындағы тарихи орындармен: М.Әуезовтың туған ауылындағы мұражай-үйімен, Абайдың Жидебайдағы мұражай-үйімен танысып, олар үшін Еңлік-Кебектің ескерткішінде, Шілікті кезеңінде, Үңгіртаста театрландырылған қойылымдар ұйымдастырылды.
