Қазақстан бойынша БЖК-2020 аясында 1,8 млрд теңгенің 700-ге жуық гранты бөлінді
17 Қыркүйек, 2015 13:39
2015 жылы «Бизнестің жол картасы-2020» бағдарламасы аясында Қазақстан бойынша 1,8 млрд теңгенің 688 гранты бөлінді, деді «Даму» қорының Астана қаласы бойынша филиалының директоры Исламбек Қайырбеков баспасөз туры барысында.
«2010 жылдан бастап «Даму» кәсіпкерлікті дамыту қоры» «Бизнестің жол картасы-2020» бағдарламасын сәтті жүзеге асыруда. Оның аясында жеңіл несиелер ғана емес, қайтарымсыз гранттар да бөлінеді», - деді ол.
Оның айтуынша, грант аясында республика бойынша 1,8 млрд теңгенің 688 гранты бөлінді. Оның ішінде Астанада 56 млн теңгенің 19 гранты бөлінді.
«Грантқа ие болатындар – шағын және орта бизнес кәсіпкерлері, өз ісін енді бастайын деп жатқан жас кәсіпкер, мүгедектер, әйелдер, 50-ден асқан адамдар. Экономика, өндіріс саласында өз идеяларын жүзеге асырғысы келетіндер», - деді ол.
Ботагөз Айтжанова
