Сенат Алматыда Дүниежүзілік денсаулық сақтау ұйымы кеңсесінің ашылуына дауыс берді
17 Қыркүйек, 2015 10:46
Сенатта «Қазақстан Республикасының Үкіметі мен Дүниежүзілік денсаулық сақтау ұйымы арасындағы Қазақстан Республикасының Алматы қаласында Дүниежүзілік денсаулық сақтау ұйымының (ДДҰ) медициналық-санитарлық алғашқы көмек жөніндегі географиялық жағынан қашық орналасқан кеңсесін ашу туралы келісімді ратификациялау туралы» ҚР Заңы қабылданды.
«ДДҰ кеңсесінің басты міндеттері медициналық-санитарлық алғашқы көмекті дамыту саласында денсаулық сақтау қызметтерін көрсетуді күшейту, ДДҰ еуропалық өңірлік бюросының денсаулық сақтау қызметтерін әділ, қайырымды, нәтижелі және тиімді ұсынуға қатысты жаһандық міндеттерін орындауға көмектесетін болады», - деді ҚР денсаулық сақтау және әлеуметтік даму министрі Тамара Дүйсенова заң жобасын таныстыру барысында.
Бұл ДДҰ кеңсесі Еуропалық өңірлік бюросының денсаулық сақтау және қоғамдық денсаулықты сақтау жүйелері бөлімінің жедел бөлімшесі ретінде жұмыс істейтін болады. Ол өз қызметін ДДҰ-ның екіжылдық жоспарлау цикліне сәйкес жүзеге асыратын болады.
Анар Тәңірқұлова
