«Мерейлі отбасы»: Бөтен бала болмайды – Төлегеновтер отбасы

15 Қыркүйек, 2015 11:26

Қостанай облысының көпбалалы, интернационалды, патронатты Төлегеновтер отбасы «Мерейлі отбасы» ұлттық байқауының республикалық кезеңіне қатысты. Нұрлан Ғалымжанұлы мен Гүлжаухар Қабдікәрімқызы 9 баланы тәрбиелеп отыр, оның 8-і асыранды бала. Отбасының ұраны: «Біздің бақытымыз – балаларда».

Ерлі-зайыптылар 1989 жылы отау құрған. 1990 жылы олардың отбасында үлкен қуаныш орын алады, тұңғыш және жалғыз балалары Бақытжан дүниеге келеді. Бұл жұп үлкен отбасы болуды армандайтын. Сөйтіп, 8 баланы өз қамқорлықтарына алды. Қазір 5 қыз, үш ұл өсіріп отыр.

2014 жылы Төлегеновтер отбасына балалар үйі отбасылық мекемесін салуға жер бөлініп берілді. Оларға Қостанай ауданының орталығы Затобол поселкесінен үй тұрғызылып берді. Оның алғашқы іргетасын қалауға аудан мұғалімдері қаржы жинаған болатын, ал этномәдени орталықтары жинаған қаржы үйді түгел салып бітіруге мүмкіндік жасады.

Гүлжауһар – мұғалім, Нұрлан – жүргізуші, балаға деген махаббат отбасын нұрландырып жіберді. Оларды қазір бүкіл облыс таниды.

«Біз байқау туралы аудандық газеттен хабарландыру оқыдық. Сосын күйеуіміз екеуміз ақылдасып, оған қатысуға арыз бердік. Алдымен ауданнан жеңдік, сосын облыстық сатыға дайындықты бастадық. Біздің байқауға қатысқан себебіміз, өзге бала болмайтынын өз отбасымыздың үлгісінде көрсеткіміз келді»,- деді Гүлжауһар Төлегенова.

Барлық жаңалықтар