Астанада ҚХА-ның «Ұлы дала елі» экспедициясы басталды (ФОТО)

11 Қыркүйек, 2015 15:58

Астанада «Қазақ елі» алаңында ҚХА-ның «Ұлы дала елі» республикалық тарихи-мәдени экспедициясы басталды, салтанатты шараға ҚР Парламент Мәжіліснің депутаттары, ҚХА мүшелері, этникалық топ өкілдері мен жастар қатысты.

ҚХА-ның «Ұлы дала елі» экспедициясы бірден Астана, Ақтау және Павлодар қалаларында бастау алды. Төрт бағыт бойынша бастау алған көш Таразда 9 қазан күні аяқталады.

100 нақты қадамды жүзеге асыру мақсатында ҚХА Астана және Алматы қаласы мен облыс әкімдері мен ҚР Инвестициялар және даму министрлігі, «Қоғамдық келісім» МРМ қолдауымен «Ұлы дала елі» республикалық тарихи-мәдени экспедициясын ұйымдастырды. Жалпы, аталмыш экспедиция Қазақ хандығының 550 жылдығына арналып отырған ауқымды шара.

Экспедиция аясында өңір халқымен «Мәңгілік ел мұраты – ел бірлігі», тақырыбында кездесулер өтеді. Ол Ұлт жоспарының «Бірлік және біртұтастық» бағытын жүзеге асыруға бағытталған.

Бір ай бойы қатысушылар бірқатар жұмыстарды атқарады. Таразға келген күні 9 қазанда жасалған жұмыстың қорытындысы бойынша баспасөз конференциясы өтеді. Экспедиция бағыты Астана қаласынан бастау алды, елдің оңтүстік және орталық аймақтарын қамтиды, атап айтсақ, Ақмола, Солтүстік Қазақстан, Қостанай, Қарағанды және Жамбыл облыстары.

Барлық жаңалықтар