Дүниежүзілік банк Қазақстанда Жастар корпусын дамыту үшін 5 млрд теңге бөлді (ФОТО)

10 Қыркүйек, 2015 16:45

Қазақстан Республикасы Білім және ғылым министрлігі мен Дүниежүзілік банк 2016-2020 жылдарға арналған Қазақстандағы жастардың дамуын қолдау бойынша Гранттық Келісімге қол қойды.

«Бүгін біз Дүниежүзілік банкпен грант туралы келісімге қол қойдық. Грант сомасы 5 млрд теңгені құрайды. Ол жұмыссыз жүрген жастарға бағытталған. Байқау арқылы іріктеліп алынатын жобалар мен жастар ұйымдары арқылы қаржыландыратын болады.Олар әр түрлі саладағы әлеуметтік жобалармен айналысатын болады: мәдениет, спорт, экологиялық жобалар. Бүгінгі таңда қолдауға мұқтаж болып жүрген жастар үшін байқау жарияланып, олардың жұмыспен қамту мәселелері шешіледі», - деді Білім және ғылым министрі Аслан Сәрінжіпов.

Жастар корпусын Дамыту жобасында жастардың жігерлігін дамыту, ересектер мен жастар арасында тұрақты қарым-қатынас қалыптастыру үшін қолдау жүйесін дамыту, сондай-ақ жастар арасында жағымды мінез-құлықты ынталандыру сияқты әр түрлі бағыттарға ерекше мән берілетін болады.

Бұл жобаны іске асыруға 8500 жас, оның ішінде жастардың осал топтары, сондай-ақ шамамен 100-ге жуық жастар ұйымы қатысады деп күтілуде.

Сонымен қатар, Білім және ғылым министрлігі жүргізіп отырған Жоба жастар саясатын іске асыру үшін институционалдық тетіктерді дамытуға ықпал етеді.

Анар Тәңірқұлова

Суретке түсірген Азамат Әлиев