Қазақстанда 2015 жылдың соңына дейін 115 мың шаршы метр арендалық тұрғын үй пайдалануға беріледі

«Арендалық тұрғын үй аясында екі бағыт бойынша жұмыс жүргізілуде. Бұл жергілікті атқарушы органның кезекте тұрушылары мен жас отбасыларға арналған баспаналар. Осы жылы 115 мың шаршы метр тұрғын үй пайдалануға берілген. 101 мың шаршы метрі пайдалануға берілді, ол жоспардың 88 пайызын құрап отыр. Жыл соңына дейін қалған көлем тапсырылатын болады», - деді вице-министр.

Оның айтуынша, ЖАО бағыты бойынша тұрғын үйге кезекте 337 112 адам тұр.  Оның ішінде  ҰОС қатысушылары мен мүгедектері – 319 адам, жетімдер – 47 613 адам, әлеуметтік аз қамтылған – 143 414 адам, мемлекеттік қызмет пен бюджеттік ұйым қызметкерлері, әскерилер – 143 610 адам, баспаналары апатты болып табылған азаматтар – 2165 адам.

«Аталмыш бағыт бойынша қолайлылықтың 4 санаты бойынша пәтерлер салынуда, Астана мен Алматы қаласында шаршы метрдің құны 120 мың теңге, өзге өңірлерде 90 мың теңге», - деді ол.

Сондай-ақ, Қ.Өскенбаев атап өткендей, Қазақстанда жас отбасыларға арналған  жеке бағдарлама бар. «Жас отбасы тұрғын үй пайдалануға берілген соң онда тұруға құқылы. 8 жыл бойы сатып алуға қажетті қаражатты жинайды. Егер ол сома жетпейтін болса, ТҚЖБ арқылы 4 пайыздық үстемемен 15 жылға нисие ала алады», - деді вице-министр.

Индира Кауметова