Сенат қылмыстық істер бойынша өзара көмек туралы америкааралық конвенцияны ратификациялады

10 Қыркүйек, 2015 11:23

Америкада сотталған Қазақстан азаматтарын елге қайтару жайлы Қазақстанның сұрауын қарауға құқықтық негіз пайда болмақ. Осы мәселені реттейтін конвенцияға қосылу туралы заң жобасы Мәжілістің қарауында жатыр. Бұл туралы бүгін Сенаттың отырысында ҚР Бас прокурорының орынбасары Жақып Асанов айтты.

Айта кетейік, тұжырымдама Нассауда 1992 жылдың 23-ші мамырында қабылданды.

Жақып Асанов Сенатта «Қылмыстық істер бойынша өзара көмек туралы америкааралық конвенцияны ратификациялау туралы» заң жобасы бойынша баяндама жасады. Оның сөзінше, Румыния және Болгариямен жасалған шарттар екіжақты болса, бұл құжат көпжақты болып табылады.

«Әрине, әрбір елмен жеке-жеке келісім жасағаннан гөрі, осындай көпжақты конвенцияларға қосылған тиімдірек. Бұл конвенцияның қатысушылары – АҚШ, Канада, Мексика, Бразилия, Боливия, Венесуэла, Колумбия, Аргентина, Чили, Ямайка сияқты Америка құрылығының 26 мемлекеті. Яғни, бір құжат арқылы біз бір мезгілде осынша америкалық мемлекетпен қарым-қатынас орнатамыз. Келешекте бұл конвенцияға қатысушы елдердің саны артатынын ескерсек, онда біз байланыс жасайтын елдердің қатары да көбейе түседі», - деді Ж.Асанов.

Бас прокурордың орынбасарының айтуынша, бұл конвенция кез келген мемлекет үшін ашық құжат, Еуропа кеңесі сияқты оның әрбір мүшесінің жеке келісімін алуды қажет етпейді.Конвенцияда құқықтық көмектің түрлері, олардан бас тартудың негіздері қарастырылған.

«Америкада сотталған азаматтардың жазасының қалған бөлігін Қазақстанда өтеуге бола ма, жоқ па деген сауалдар қойылады. Бұл мәселе бүгін қаралып отырған шартпен реттелмейді. Ол сотталғандарды беру туралы басқа конвенцияда қаралған, оған қосылу мәселесі Мәжілістің қарауына келесі аптада жалпы отырыста шығарылады деген болжам бар. Бұл шарт ратификациядан өтсе, онда Америкада сотталған азаматтарымызды елге қайтару жайлы біздің сұрауымызды қарауға құқықтық негіз пайда болады», - деді Ж.Асанов.

Барлық жаңалықтар