Ұлттық банк жеке тұлғалардың ұлттық валютада ашылған депозиттері бойынша бағамдық айырманы төлейді

9 Қыркүйек, 2015 15:17

Қазақстан Республикасы Президентінің тапсырмасы бойынша ҚР Ұлттық Банкі Еркін өзгермелі айырбастау бағамы режіміне өтуге байланысты жеке тұлғалардың ұлттық валютада (теңгеде) ашылған депозиттері бойынша бағамдық айырманы төлеу тетігін әзірлеп, тәртібін бекітті, деп хабарлады банк.

Тәртіпке сәйкес, салымшыда 2015 жылғы 18 тамыз операциялық күннің соңында екінші деңгейдегі банктерде және /немесе «Қазпочта» АҚ-та теңгемен ашылған депозит болған кезде оған бағамдық айырма төленетін болады.

«Бұл ретте 2015 жылғы 18 тамыздағы жағдай бойынша банк шотындағы салым бойынша қалдық 1 миллион теңгеден аспауға тиіс. Бағамдық айырманы төлеу жеке тұлғалардың мерзімді депозиттері бойынша жүзеге асырылады. Бағамдық айырманы алу үшін салымшы депозитті арнайы шотта кемінде бір жыл сақтау жөнінде өзіне міндеттеме алады», - делінген хабарламада.

Салымшылар 2015 жылғы 1 қазанға дейін банкке депозитті қайта ресімдеу үшін өтініш жасауы қажет. Өтемақы тетігінің шеңберінде 2 млн. жуық салымшыға бағамдық айырманы төлеу жоспарланып отыр. Ақы төлеу шарттарымен Ұлттық Банктің сайтында «Қаржылық қызметтерді тұтынушылардың құқықтарын қорғау» бөлімінде танысуға болады.

Барлық жаңалықтар