ҚР Қарулы Күштерінің әскери полициясы органдарында әскери міндеттілермен әскери жиын басталды (ФОТО)
Жиын 23 қыркүйекке дейін созылады, оған 31 мен 37 жас аралығындағы 70 адам қатысады. Әскери міндеттілер жауынгерлік даярлық пен әскери іс негіздерін, сондай-ақ Қазақстан Республикасының Қарулы Күштерінде, басқа да әскерлері мен әскери құралымдарында құқықтық тәртіпті қамтамасыз ету мәселелерінде әскери полиция органдарының қызметі мен міндеттерін регламенттейтін нормативтік-құқықтық актілерді зерделейді.
Жиын аяқталысымен әскери міндеттілер әскери есепке алу мамандықтары мен лауазымдарға сәйкес келуіне жиынның оқу бағдарламасын меңгергенін растау үшін емтихан және сынақ тапсырады. Резерв бағдарламасын сәтті аяқтағандарға кезекті әскери атақ беріліп, грамоталар табыс етіледі.
Қарағанды облысына қарасты «Спасск» оқу-жаттығу орталығындағы әскери міндеттілер жиынының өту барысын ҚР ҚК Әскери полициясы бас басқармасының бастығы генерал-майор Тимур Дәндібаев бақылап отырды.
Әскери жиынның негізгі мақсаты әскери бөлімдердің жауынгерлік және жұмылдыру әзірлігін арттыру, Қазақстан Республикасының Қарулы Күштерін, басқа да әскерлері мен әскери құралымдарын өрістету үшін қажет қорда әскери-оқытылған ресурстарды дайындау және жинақтау болып табылатынын айта кетейік.
