Павлодар облысында «Ақ бұлақ» бағдарламасы бойынша орталықтандырылған сумен 79 ауыл қамтамасыз етілді
Облыс жер қойнауын пайдалану, қоршаған орта және су ресурстары басқармасының басшысы Әлібек Ермұханұлы Несіпбеков берген ақпар бойынша 2015 жылғы қаңтарда Аймақтарды дамытудың 2020 жылға дейінгі бағдарламасымен біріктірілген «Ақ бұлақ» бағдарламасы бойынша орталықтандырылған сумен қамтамасыз етудің бүгінгі көрсеткіштері 19,4%-ды немесе 79 ауылдық елді мекенді құрайды. 2011 жылмен салыстырғанда ауыл тұрғындарын орталықтандырылған сумен қамтамасыз ету 30 мың адамға дерлік артты.
12 ауылдық елді мекенде сумен қамтамасыз ету нысандары іске қосылды. 237 ауыл құбырлы шахта құдықтарынан су ішіп отыр. 10 ауылдық елді мекен немесе 3233 адам сырттан жеткізілетін ауыз суды пайдаланады. 81 ауылдық елді мекен кешенді блок модуль (КБМ) қондырғыларынан тазартылған су алып отыр.
Аймақ басшысы Қ. Бозымбаев қала және аудан әкімдеріне, облыс жер қойнауын пайдалану, қоршаған орта және су ресурстары басқармасына ауыл тұрғындарын сумен жабдықтаудың жергілікті көздерімен қамтамасыз ету мәселесін қарастыруды, мүмкін болса, бір ай ішінде КБМ қондырғыларын сырттан әкелетін суды пайдаланып отырған және сапалы ауызсуға зәру ауылдарға орнату мәселесін пысықтауды тапсырды, сондай-ақ Павлодар қаласының әкіміне Ленин кентін сумен жерасты суын пайдалану арқылы қамтамасыз ету мәселесін жылдамдатуды тапсырды.
