Қазақстандықтарға үздік отандық азық-түлік өнімін таңдау ұсынылуда

Ереже бойынша әр жобаға қатысушы үшін бір рет қана дауыс беруге болады. Байқауға қатысуға Қазақстанның барлық аймақтарынан 70-тен астам өндірушілер өтініш берді. Олар түрлі номинациялар бойынша 100-ден астам тауар маркасын ұсынды.

«Барлық номинациялар бойынша қатысушылар көп болды. Алайда сүт, макарон мен ұн өнімдері бойынша қатысушылардың айтарлықтай басымдылығы байқалды. Олар бойынша іріктеу жүргізуге тура келді. Біз бұл брендтер өз өнімдерін кем дегенде еліміздің үш өңірінде таратуы бойынша іріктедік. Өздеріңіз білетіндей, Елбасы Қазақстан әлемде бидай экспорты бойынша бесінші орында екенін атап өтті. Сондықтанда «ұн» санатында, сонымен қатар сүт өнімдері санатында да брендтер өте көп болды», - деді Р. Тәжібаева.

Дауыс беру 8 қазанға дейін жалғасады. Ал, жеңімпаздарды марапаттау рәсімін қазанның 19-ы Миландағы ЭКСПО-2015  көрмесіндегі ҚР-ның павильонында өткізу жоспарланған. Жеңімпаздар екі жыл бойы өз өнімдерінің қаптамасына «Халық маркасы» белгісін орналастыра алады және  Астанада өтетін ЭКСПО-2017 көрмесіне ұсынылатын болады.