Қызылордада жылыту маусымына дайындық басталды (ФОТО)

8 Қыркүйек, 2015 09:13

Қызылорда облысы әкімі Қ.Көшербаевтың төраалығымен өткен аппарат отырысында облыстық энергетика және тұрғын үй-коммуналдық шаруашылығы басқармасының басшысы Ержан Әбдіқалықов қысқа дайындық жұмыстары жөнінде баяндады.

Ол атап өткендей, аймақта 1041 әлеуметтік нысан бар. Жоспарланған жөндеу жұмыстары толығымен аяқталды. Жалпы әлеуметтік нысандардағы бу қазандықтардың 83 пайызы ағымдағы жөндеуден өтті.

Тағы бір айта кетерлігі, коммуналдық қызметтердің ақысын төлеуге тұрғындар асығар емес. Қыркүйекке дейінгі берешек 583,7 млн. теңге. Оның ішінде жылуға қарыз 360,6 млн. теңге болып тұр. Оның 71 пайызы тұрғындар үлесіндегі қарыз болса, қалғаны мекемелердің берешегі.

Жылу майсымы басталғанша әлеуметтік нысандар толық дайын болуы тиіс. Аудандардағы газдандыру жұмыстары осы әлеуметтік нысандардан басталу қажеттігін тағы каперлеріңізге саламын. Коммуналдық қызметтің ақысын уақытылы төлеу керек. Осыған байланысты жұмысты күшейтіңіздер, - деді облыс әкімі Қ.Көшербаев.

Сондай-ақ, аймақ басшысы жоспарға сәйкес жүргізіліп жатқан жөндеу жұмыстарының сапасын назардан тыс қалдырмау қажеттігін тағы бір ескертті.