Ә.Жақсыбеков: Астана Индустриалды паркінің инвестициялық тартымдылығын жетілдіру қажет

7 Қыркүйек, 2015 15:19

Астана қаласы әкімдігінде елорда басшысы Әділбек Жақсыбековтің төрағалығымен кезекті аппараттық отырыс өтті. Отырыс барысында қаланы абаттандыру, коммуналдық қызметтер, Астананың индустриалды паркін дамыту мәселелері талқыланды, деп хабарлады қалалық әкімдік.

Осы аптада Астананы дамытудың 2016 жылға арналған бюджеті қарастырылады.

«Бюджеттің табысты бөлігінің бірі болып саналатын шағын және орта бизнесті дамыту керек. Ол үшін оларға барлық қажетті жағдай жасау керек. Бүгінде жергілікті бюджетке түсім мөлшері жаман емес. Бірақ түсімді арттыра беру керек», - деді Әділбек Жақсыбеков.

Ағымдағы бюджеттің орындалуына қатысты елорда басшысы бюджеттік бағдарламалар әкімшілерін бөлінген әр теңгеге мұқият болуды тапсырды.

Әділбек Жақсыбеков Астананың бірінші индустриалды паркі инфрақұрылымынының дамуы бойынша ескерту жасады. Бұл жерде жаңа инвесторларды тарту жұмысы тиісті деңгейде емес. Жер учаскесін алу үшін құжат тапсыру ұзақ уақытты алады. Қала әкімі аталған мәселелерді шешу бойынша нақты іс-шаралар жоспарын құруды тапсырды.

Әділбек Жақсыбеков қала тұрғындарының мәдени-спорттық демалысын ұйымдастыру бойынша УЕФА чемпиондар лигасы аясында «Астана» футбол клубының алда өткізетін кездесулерін ұйымдастыру жұмыстарын жүргізуді тапсырды. Билет сату орындарын көбейтіп, алыпсатарлыққа жол бермей, көрермендер мен жанкүйерлерді стадионға бір орталықтан жеткізу жүктелді.

Барлық жаңалықтар