ҚР МСМ «Мәңгілік ел» идеясын қолдау бойынша ҚХА туралы Заңға толықтырулар енгізуді ұсынды

7 Қыркүйек, 2015 10:56

2008 жылдың 28 қазанында шыққан «Қазақстан халқы Ассамблеясы туралы» Заңына «Мәңгілік ел» жалпыұлттық идеясының жүзеге асуын қамтамасыз ететін ҚХА-ның қызметі мен міндетін кеңейту туралы толықтырулар мен өзгертулер енгізу ұсынылуда, деді ҚР Парламент Мәжілісіндегі жұмыс тобының отырысында Мәдениет және спорт вице-министрі Марат Әзілханов.

«Ұлт жоспарының «Бірлік пен біртұтастық» төртінші бағыты бойынша жалпықазақстандық бірлікті нығайту, қоғамның бірлігі, «Мәңгілік ел» жүйелік құндылығын дамыту мәселелері қарастырылған. Аталмыш шараларды жүзеге асыру мақсатында қоғамдық-саяси тұрақтылық пен этникаралық қарым-қатынас саласындағы әрекеттегі заңнаманы жетілдіру қарастырылып отыр. Осы орайда 2008 жылдың 28 қазанында шыққан «Қазақстан халқы Ассамблеясы туралы» Заңына «Мәңгілік ел» жалпыұлттық идеясының жүзеге асуын қамтамасыз ететін ҚХА-ның қызметі мен міндетін кеңейту туралы толықтырулар мен өзгертулер енгізу ұсынылуда», - деді М.Әзілханов.

Оның айтуынша, заң жобасында «Мәңгілік ел» жалпыұлттық патриоттық идеясы құндылықтары негізінде Қазақстандағы ұлтаралық келісімді қамтамасыз ету мәселесін дамыту.

«Ассамблеяның негізгі рөлі қазақстандық азаматтық бірліктің, патриотизмнің, Қазақстан халқының ортақ мәдениетінің қалыптасуын дамыту болса, бұл міндеттерге бірыңғай мақсаттар мен міндеттер аясында қоғамның нығаюы міндеті қосылады», - деді вице-министр.

Ботагөз Айтжанова

Барлық жаңалықтар