А.Айымбетов: Қазақстанның ғылыми ғарыштық бағдарламасының орындалуына кірістім
5 Қыркүйек, 2015 13:46
Қазақстандық ғарышкер-сынаушы Айдын Айымбетов Халықаралық ғарыш бекетінен Қазғарыш басқарма төрағасы Талғат Мұсабаевпен байланысқа шықты, деп хабарлады Қазғарыш.
Әңгімелесу барысында А.Айымбетов Халықаралық ғарыш станциясымен түйісуге дейінгі «Союз ТМА-18М» ғарыш кемесінің ғарыштық ұшуының штаттық режимі туралы айтты.
Сондай-ақ, экипаж мүшелерінің медициналық жағдайы қанағаттанарлық және ҚР ғылыми ғарыштық бағдарламасының орындалуына кірісу туралы да айтылды.
«Қал-жағдайым жақсы, бейімделу де өз қалпында, Қазақстан Республикасының ғылыми ғарыштық бағдарламасының орындалуына кірістім», - деді А.Айымбетов.
Әңгімелесу қорытындысында Т.Мұсабаев ХҒС командирі Генадий Падалканы ғарыштық кеңістікте ең ұзақ уақыт болуы бойынша әлемдік рекордты жаңартқанымен құттықтады. Қазғарыштың бірінші ғарышкеріне және экспедицияның барлық қатысушыларына жұмыстың сәттілігі мен Жерге ама-есен оралуларын тіледі.
