Әуе шабуылына қарсы қорғаныс әскерлерінің 120 жас офицеріне алғашқы жауынгерлік тексеріс ұйымдастырылды (Фото)

4 Қыркүйек, 2015 18:32

Қарағанды облысына қарасты «Сарышаған» полигонында әуе шабуылына қарсы қорғаныс әскерлері әскери бөлімдері жас лейтенанттарының далалық жиыны аяқталды, деп хабарлады Қорғаныс министрлігі.

Офицерлер ҚР заңдары мен нормативтік актілерін, әскери жарғыларды, атыс, арнайы және дене даярлығы ережелерін егжей-тегжейлі зерделеді, психологиялық тестілеу тапсырып, Макаров тапаншасын жауынгерлік қолдану шеберлігі мен өздерінің мергендіктерін паш етті.

Жиын ҚР ҚК ӘҚК ӘШҚҚ әскерлері қолбасшысының тәрбие және идеологиялық жұмыстар жөніндегі орынбасары полковник Нұрлан Досмағамбетовтің басшылық етуімен өтті.

«Жас офицерлерге ҚР ҚК бөлімдерінде алдағы әскери қызметке бейімделу, қажетті жауынгерлік машықты игеріп, жоғары оқу орнында алған теориялық білімдерін іс жүзінде барынша қолдану қажет. Мұның барлығына далалық жиындар керемет ықпал етеді деп ойлаймын», - деді ол. Жауынгерлікке жақындатылған жағдайларда өздерінің білімдері мен мүмкіндіктерін тексере отырып, лейтенанттар әскери бөлімдерде қызмет етуге кірісті.

Жыл сайын әуе шабуылына қарсы қорғаныстың қатары еліміздің жоғары әскери оқу орындарының түлектерімен толықтырылып жатқанын атап өткен жөн.