Мәжілісте «Астана» халықаралық қаржы орталығы туралы» заң жобасы таныстырылды

4 Қыркүйек, 2015 17:14

Бүгін Қаржы және бюджет комитетінің төрайымы Гүлжан Қарағұсованың жетекшілігімен «Астана» халықаралық қаржы орталығы туралы» Қазақстан Республикасы Конституциялық заңы жобасының тұсаукесер рәсімі өтті, деп хабарлады палата.

Тақырып төңірегінде баяндама жасаған Қазақстан Ұлттық Банкі Төрағасының орынбасары Нұрлан Құсайыновтың атап өткеніндей, құжат Елбасының «Астана» халықаралық қаржы орталығы және ҚР Ұлттық Банкін Астана қаласына көшіру туралы» Жарлығына сәйкес әзірленген. Сонымен қатар, Ұлт жоспарын заңнамалық тұрғыдан қолдауға бағытталады.

Н. Құсайынов заңды құжат арқылы орталықта ерекше салық, валюталық және визалық режимінің, сондай-ақ Орталық органдарының және қатысушыларының шетелдік жұмыс күшін тартудың ерекше режимі болатынын атап өтті. Мәселен, заң жобасында Орталықтың органдарына, қатысушыларына, сондай-ақ Орталық органдары мен қатысушыларының қызметкерлеріне 50 жыл мерзімге салық жеңілдіктерін беруге қатысты нормалар көзделген.

Сонымен қатар, орталықтың органдары мен қатысушылары үшін жеңілдетілген валюталық, визалық және еңбек режимдері қолданылады. Мәселен, орталық қатысушыларының немесе органдарының қызметкерлері саналатын шетелдіктер және азаматтығы жоқ адамдар және олардың отбасы мүшелері бес жылға дейін қолданылу мерзімімен кіру визасын алады.

Орталықтың ресми тілі ретінде ағылшын тілі белгіленіп, ол Орталықтың бүкіл аумағында Орталық реттейтін қоғамдық қатынастардың барлық салаларында қолданылады. Сотта істі қарау, сондай-ақ Орталыққа қатысушылардың барлық мәмілелері де ағылшын тілінде жүргізіледі және баяндалады.

Заң жобасында Дубай халықаралық қаржы орталығына ұқсас Орталықтың аумағында тәуелсіз және Қазақстанның қазіргі кездегі сот жүйесінен оқшауланған Орталықтың өз сотын құру көзделуде, Орталық органдарының, қатысушыларының және олардың қызметкерлерінің қатысуымен туындайтын дауларды қарау мен шешу оның айрықша құзыреті болып есептеледі.

Сонымен қатар, заң жобасында Халықаралық төрелік орталығын құру көзделген, ол тараптар арасында төрелік келісім болған жағдайда дауларды қарайды.

Мәжіліс депутаттары Ш. Мырзахметов, Т. Өмірзақов, Г. Щегельский, О. Өксікбаев, Қ. Жабағиев, Т. Ерғалиев жаңадан жұмысқа қабылданған заң жобасының олқы тұстарын көрсетіп, нақты сұрақтар қойып, өз ұсыныстарын жеткізді. Оның барлығы алдағы талқылауларда есепке алынатын болады.

Жұмыс тобының жетекшісі Мәжіліс депутаты, Қаржы және бюджет комитетінің хатшысы Т. Яковлева.