Астанада Түркі кеңесі Білім министрліктерінің басшылары кездеседі

3 Қыркүйек, 2015 16:38

Астанада 2015 жылғы 4-5 қыркүйекте Түркі кеңесі Білім министрлерінің аға лауазымды тұлғаларының бесінші отырысы және Түркі кеңесінің Білім министрлерінің төртінші отырысы өтеді, деп хабарлады ҚР Білім және ғылым министрлігі.

Түркітілдес мемлекеттердің ынтымақтастық Кеңесінің Білім министрліктерінің жоғары лауазымды тұлғаларының V кездесуіне Әзірбайжанның, Қазақстанның, Қырғызстанның, Түркияның білім беру саласының 26 басшысы және Түркі кеңесінің өкілдері қатысады.

Кеңестің қатысушылары бағдарламалардың мазмұны және жалпы түркі тарихы оқулықтарын дайындау (15 ғасырға дейінгі кезең және 15 ғасырдан 21 ғасырға дейінгі кезең аралығы), география мен әдебиет бойынша бірқатар мәселелерді талқылайды. Қазір оқулықтар әзірлену сатысында, мүше-елдер бағдарламаны қайта қарау және мазмұны туралы өз ұсыныстарын енгізуде. Өңдеу аяқталғаннан кейін оқулықтар мектеп бағдарламасына енгізіледі.

Түркі кеңесі елдерінің өкілдері одан әрі орта мектептер мен жоғары оқу орындарының студенттерін алмастырудың бағдарламасын және қаржылық жағын қарастырады. Түрік Республикасы осы жобаны іске асырушы алғашқы мемлекет болмақ. Сондай-ақ, білім беру саласының басшылары Түркі академиясы мен Түркі тілдес елдер университеттерінің Одағы арасындағы ынтымақтастықтың шарттарын және басқа да мәселелерді талқылайды.

Барлық жаңалықтар