Астанада Қазақ хандығының 550 жылдығына арналған театрландырылған қойылым өтеді

3 Қыркүйек, 2015 13:37

2015 жылдың 11 қыркүйегінде «Барыс» мұз айдынында Қазақ хандығының 550 жылдығына арналған «Мәңгілік ел» театрландырылған қойылымы өтеді, деді ҚР МСМ мәдениет және өнер ісі жөніндегі департамент директоры Ақтоты Райымқұлова ОКҚ брифингінде.

Шараның нақты мақсаты- бұқараны Қазақ хандығының тарихымен кеңінен таныстыру. Оның тарихи рөлінің ашылуы мен ел тұрғындарының мәдени-рухани деңгейінің көтерілуіне, халықтар достастығына қосқан үлесі туралы мағлұмат береді.

«Бұл өте әсерлі театрландырылған қойылым. Біз мәдениеттің байлығын Қазақ хандығының тарихын қойылыммен паш еткіміз келеді. Қойылым сонау сақтар кезеңінен басталып, Ұлы Жібек Жолы, Шыңғысхан кезеңдерін қамтиды. Тарих кезеңдерін ашып беруге тырысамыз. Әрине, бір жарым сағат ішінде бұл мақсатты орындау оңай емес. Қазір бұл қойылым бойынша 2000 адам жұмыс істеуде», - деді А.Райымқұлова.

Концертте ұлттық өнердің әр түрлі жанры қамтылады: ән мен күй және би мен хорлық орындаудың тамаша үлгілері көрсетіледі.

Департамент директоры атап өткендей, бүгінгі таңда бірқатар шаралар өткізілді. Ресейде, Қытайда, Пәкістанда, Иранда, Түркияда, Өзбекстанда, Мысырда ғылыми-тәжірибелік конференциялар өтті. Жаңа театрландырылған қойылымдар құрылды.

Сондай-ақ, Астанада Елбасының және отандық ұйымдар мен шетелдік БАҚ-тың қатысуымен салтанатты шара өтеді.

«Сондай-ақ, Назарбаев университетінде тәжірибелік конференция өтеді. Оған 1000 шетелдік және отандық ғалымдар, халықаралық сарапшылар, парламент депутаттары, жетекші елдердің бизнес-қауымдастықтары қатысады», - деді ол.

Барлық жаңалықтар