Байқоңыр ғарыш айлағынан бортында қазақстандық ғарышкер бар «Союз ТМА-18М» ғарыш кемесі ұшырылды

2 Қыркүйек, 2015 10:41

«Союз-ФГ» ракета-тасымалдаушысы «Союз ТМА-18М» ғарыш кемесімен Байқоңыр ғарыш айлағының Гагарин алаңынан ұшты.

Халықаралық ғарыш станциясына ұшқан негізгі экипаждың құрамында ресейлік ғарышкер Сергей Волков, қазақстандық ғарышкер, ЭП-18 бағдарламасы бойынша 2-ші бортинженер Айдын Айымбетов, Еуропалық ғарыш агенттігінің астронавты Андреас Могенсен бар.

Кеменің станциямен тоғысуы 4 қыркүйекке жоспарланған.

ХҒС-қа олардың келіп жетуін ресейлік Генадий Падалка, Михаил Корниенко және Олег Кононенко, американдық астронавттар Скот Келли мен Челл Линдгрен, сондай-ақ, жапондық астронавт Кимия Юи күтеді.

«Союз ТМА-18М» командирі Сергей Волков орбитада 188 тәулік болады. Ал, Могенсен мен Айымбетов Жерге 12-ші қыркүйек оралуды жоспарлауда.

Айта кетейік, ҚР Премьер-Министрінің орынбасары Б.Сапарбаев А.Айымбетовке ЭКСПО-2017, Қазақстан халқы Ассамблеясы эмблемаларын табыстады. Сондай-ақ, экипаж құрамына сәттілік тіледі. Сонымен қатар, «Қазғарыш» басшысы Талғат Мұсабаев пен тұңғыш қазақстандық ғарышкер Тоқтар Әубәкіров те сөз сөйледі.

Сонымен қатар, орбитада болған кезде А.Айымбетов қазақстандық ғылым үшін бірқатар сынақтар жүргізетін болады.