Ақтаудағы халықаралық музыка және спорт фестиваліне 60 мыңнан астам адам келді (ФОТО)

31 Тамыз, 2015 14:33

Ақтауда жыл сайын ұйымдастырылатын «Aktau Open Fest 2015» халықаралық музыка және спорт фестивалі өз мәресіне жетті. Үн күн бойы Қазақстан, Ресей, Әзірбайжан мен Түркіменстанның 250-ден астам спортшылары стритбол, воркаут, паркур, брейк-данс бойынша өз шеберліктерін ортаға салды.

Аймақ әкімдігінен хабарлағандай, Aktau Open Fest фестивалі 2013 жылдан бері жыл сайын ұйымдастырылып келеді. Оған Қазақстанның барлық аймақтары мен шет мемлекеттерден азаматтар келіп қатысады. Өздерінің өнерлерін ортаға сала отырып, олар Маңғыстау жастарына үлгі болады. Онда спортшылар тұрғындардың өтініштері бойынша шеберлік сыныптарын да өткізеді.

«Aktau Open Fest» фестивалінің көлемі жыл сайын оған қатысушылар жағынан да онда көрсетілетін өнер түрлері жағынан да кеңейіп келеді. Өткен жылы екі күнде фестивальға 30 мыңға жуық адам қатысқан. Биыл 3 күн ішінде одан да көп жастар келді. Фестивальға 60 мыңнан астам адам қатысты, бірінші күні – 15 мың адам, екінші күні 20 мыңға жуық, үшінші күні 25 мыңнан астам адам тамашалады», – деді фестиваль ұйымдастырушысы Самсон Аракелян.

Аталып өткендей, «Aktau Open Fest 2015» хедлайнері қазақстандық спорт жұлдызы олимпиада жеңімпазы Серік Сапиев болды.