ШҚО-да Жапониядан әкелінген «Хиросиманың бейбітшілік тасы» ескерткішінің ашылу салтанатында 15 000-ға жуық адам қатысты

29 Тамыз, 2015 15:17

Семей қаласында қарудан бас тартқан күнге орай Түйемойнақ аралында 15 000-ға жуық адамның қатысуымен «Бейбітшілік акциясы» өтіп, Жапониядан әкелінген салмағы 100 кг, биіктігі 3 метр құрайтын «Хиросиманың бейбітшілік тасы» ескерткіші орнатылды.

Қала тұрғындары, аймақ қонақтары қатысқан акцияға сонымен қатар Қазақстан Республикасындағы Жапонияның Төтенше және өкілетті елшісі Камахара Масаёси және «Бейбітшілік Тасы» Ассоциациясы сынды халықаралық ұйымдардың өкілдері келді.

«Елбасымыздың тапсырмасымен бүгінгі күні полигонның зардаптарын жойып, халықтың денсаулығын жақсарту үшін мемлекет тарапынан біраз істер атқарылып жатыр. Осы орайда ҚР Тұңғыш Президенті Қорының қаржыландыруымен сауықтыру орталығының құрылысы жоспарлануда. Тұрғындар денсаулығын жақсарту мақсатында шетелдік әріптестердің, соның ішінде Жапония үкіметінің атқарған жұмысы зор. Біз ядролық қару зардаптарын жақсы білеміз және болашақта сондай қиыншылықтардың болмауы үшін бірлесе жұмыс жасауымыз қажет. Осы орайда, акцияға қатысушыларға, қала тұрғындарына,облыс басшылығы атынан алғыс білдіре отырып, митинг жұмысына табыс тілеймін», – деді Жақсылық Омар.

Түйемойнақ аралына орнатылған «Хиросиманың бейбітшілік тасын» Жапонияның «Киодо Цушин» ақпараттық агенттігі жанындағы «Хиросиманың бейбітшілік тасы» үкіметтік емес қоры Хиросима мен Нагасаки қалаларындағы жарылыстың 70 жылдығына орай Семей қаласына әкелген. Ескерткіште бейбітшілік нышаны Каннон құдайының келбеті бейнеленген.

Сонымен қатар, шара барысында қонақтар Ұлттық ядролық орталықтың облыстық тарихи-өлкетану мұражайының кітапханасында сақталып келе жатқан мұрағат құжаттармен танысты

Барлық жаңалықтар