Жас курсант-авиаторлар Л-39 реактивті ұшағын сынауда
20 Тамыз, 2015 20:43
Балқаш қаласына қарасты 53898 әскери бөлімінің авиациялық оқу-жаттығу базасында Талғат Бегелдинов атындағы Әуе қорғанысы күштері әскери институтының 3 курс тәлімгерлерімен ұшу сынақтары басталды, деп хабарлады ҚР ҚМ баспасөз қызметі.
Курсанттар жоғарғы әскери оқу орнында меңгерген теориялық білімдерін іс жүзінде қолданатын болады. Болашақ ұшқыштар қозғалтқыштың жабдығы, ұшақтың құрылысы туралы білімінен өзге де ұшу жұмыстарын реттейтін және ерекше жағдайлардағы іс-қимыл бойынша нұсқаулық құжаттарын зерделеуі қажет. Ұшу басталғанға дейін барлық курсанттар құрлықтағы даярлық курсы бойынша сынақтарды сәтті тапсырып, реактивті Л-39 оқу-жаттықтыру ұшағымен ұшуға кіріседі.
Балқаш қаласына қарасты 53898 әскери бөлімі авиациялық оқу-жаттығу орталық мамандарының Л-39 ұшағында ұшқыштарды даярлауда мол тәжірибесі бар. Осылайша жылдан жылға ұшу мұрасын тапсыру ұрпақтан ұрпаққа жалғасып келеді.
