Ақтөбе облысының инвестициялық әлеуетін Түркияның өндірістік орталығы Конья қаласында таныстырылды

Аймақтық индустриалды – инновациялық даму басқармасынан хабарлағандай, сапардың негізгі мақсаты — қазіргі заманғы Түркияның жеделдетілген дамуының жинақталған тәжірибесін, негізінен өнеркәсіптік орталық — Конья қаласы индустриалды аймағының қызмет ету механизмін зерттеу.

Конья қаласында 9 ұйымдасқан өнеркәсіптік аймақ пен 15 шағын индустриалды аймақ жұмыс істейді.

«Аймақаралық ынтымақтастықты дамыту мақсатында әкім Конья аймағы басшылығымен кездесті. «Жасыл технологияны» қолданатын энергетика, құрылыс индустриясы, металл өңдеу саласындағы бірқатар кәсіпорындарда болды. Сондай-ақ облыс әкімі Анталья қаласының мэрімен кездесіп, туристік саладағы инвестициялық ынтымақтастық мәселелері талқыланды», - делінген хабарламада.

2049 га аумақты иеленген Коньяның ұйымдасқан өнеркәсіп аймағында өндірістің 80 әр түрлі секторындағы 520 кәсіпорын жұмыс істейді, оларда жұмыс істейтіндердің саны — 30 мың адам.

Автомобиль өнеркәсібі, машина құрылысы және жабдықтар, металл өнімдері өндірісі, азық-түлік және сусындар өндірісі, жиһаздар, тері, пластмасса, резеңке, тоқыма бұйымдары, ағаш, қағаз және металл емес минеральды өнімдер секілді салалар даму үстінде. Коньяның ұйымдасқан өнеркәсіп аймағында болу барысында Ақтөбе облысының инвестициялық әлеуеті мен жобалары таныстырылды, экономиканың әр түрлі салалары бойынша әріптестік туралы кәсіпорындардың ұсыныстары білдірілді.

Ақтөбе облысының әкімшілігі ірі деңгейдегі жобаларды жүзеге асыруға түрік инвестициясын тартуға мүдделілігін айқындады.