Алматылық оқушылар оқу құралдарымен 98%-ға қамтылды
17 Тамыз, 2015 11:13
Алматы қаласының білім саласы 2015-2016 жылдардағы жаңа оқу жылына 98 %-ға дайын, деп хабарлады қала әкімдігінен.
Білім басқармасының мәліметі бойынша, алматылық мектеп оқушылары оқу құралдарымен толық қамтамасыз етіледі, мектептерге оқулықтар жүз пайыз тегін жеткізілген.
Мегаполистің 7 мектебінде құрылыс жұмыстары белгіленген кестеге сай жүруде. Бұдан өзге, жаздың аяғына дейін селден зардап шеккен Наурызбай ауданындағы №187, №188, №192 мектептерде жөндеу жұмыстары аяқталады.
Алматы қаласындағы 202 мектептің 200 нысаны жаңа оқу жылына жүз пайыз дайын.
Естеріңізге сала кетейік, «Нұрлы жол» бағдарламасы аясында Алматының Алатау ауданындағы №26 мектеп жанынан салынып жатқан 900 орынды қосалқы нысан және Әуезов ауданының Қалқаман ықшам ауданындағы №157 мектеп жанындағы қосалқы құрылыс 2016 жылы пайдалануға берілмек.
