ОҚО-ның аграрийлері Алматыдағы жәрмеңкеге 200 тоннадан астам азық-түлік әкелді

15 Тамыз, 2015 15:37

Бүгін Алматыда Оңтүстік Қазақстан облысы ұсынған ауыл шаруашылығы тауарларының жәрмеңкесі өтті. ОҚО-ның 11 ауданы мен Шымкент, Түркістан, Арыс қалалаларынан келген фермерлер Алматыда сатып алушыларға 200 тоннадан астам азық-түлік ұсынды, деп хабарладыя қала әкімдігі.

Аталып өткендей, жәрмеңке барысында алматылақтарға 56 тонна ет, 5 тонна сүт өнімдері, жеміс-көкөністерден 75 тонна және тағы басқа тауар жеткізілді. Қала азаматтары елуден астам азық-түлік түрлерін базардағы бағадан 15-20 пайызға төмен сатып алды.

«Қала тұрғындарымен қатар, Алматы әкімі жәрмеңкедегі тауарлардың құнына және сапа деңгейіне баға беріп, жүзім және шұбат сатып алды», - делінген хабарламада.

Шара барысында Оңтүстік Қазақстан облысының әкімдігі мен тауарөндірушілері бірлесіп, Алматы қаласында логистикалық орталық құруды ұсынды. Бұл қала базарларына тауарын тікелей жеткізіп, төмен бағада сауда жасауға ниетті ОҚО фермерлері үшін қолайлы болмақ. Алматы әкімі тиісті басқармаларға ұсынысты қарастырып, талқылауды міндеттеді.

Естеріңізге сала кетейік, Алматыда ауыл шаруашылық жәрмеңкелері азық-түлік бағасын бірқалыпты ұстау мақсатында 7-ші жыл қатарынан өткізіп келеді.