Елордалық кеден бекеті кедендік декларациялау жүйесін жаңғыртты

14 Тамыз, 2015 17:15

«Астана кедендік рәсімдеу орталығы» кедендік құжаттарды рәсімдеу уақытын азайтып, қызмет сапасын жақсарту үшін электронды кезек тәртібіне ауысты,деп хабарлады «Астана кедендік рәсімдеу орталығы» кеден бекетінің басшысы Мұрат Абдрахманов.

«Мемлекеттік кірістер комитеті құрылған болатын. Осы бір жыл ішінде Астанадағы мемлекеттік кірістер департаменті бизнеске жеңіл болатын біраз шараларды қолға алды. Соның бірі бүгін «Астана кедендік рәсімдеу орталығы» жаңа қағидат бойынша, яғни, Халыққа қызмет көрсету орталықтарындағы қызмет тәртібі сияқты, электронды талонмен жұмыс істеу тәртібіне ауысты», - деді ол сөз басында.

М.Абдрахмановтың айтуынша, бұрын рәсімдеу орталығына келген адамдар кезек күтіп, қолайсыздықтарға да тап болып жататын. Астана қаласына тасымалданатын сыртқы тауарлардың барлығы осы кедендік рәсімдеу орталығынан өтеді, сондықтан, біздің қызметке жүгінетін кәсіпкерлер қарасы көп. «Электронды кезек қызмет сапасын жақсартып, кәсіпкерлердің уақытын үнемдейді әрі жаңадан орнатқан озық технологиялардың арқасында құжаттарды рәсімдеу уақыты да әлдеқайда азайып отыр», - деді ол.

«Бүгінде кедендік рәсімдеу орталығында 20 адам қызмет көрсетеді. 2015 жылдың бірінші жарты жылдығында 6 мыңнан аса жүк және кедендік декларациялар рәсімделіп, кедендік кірістер 12 млрд. теңгеден асты», -деп толықтырды «Астана кедендік рәсімдеу орталығы» кеден бекетінің басшысы Мұрат Абдрахманов

Барлық жаңалықтар